Avval xabar berganimizdek hukumat komissiyasining tegishli bayoniga muvofiq joriy yilning 1-iyul kunidan 1-avgust kuniga qadar “Dolzarb  30 kun”  e’lon qilingan bo‘lib, mazkur tadbirlar doirasida  “Farg‘onaazot” AJ  Sanoat xavfsizligi boshqarmasi  hamda  FVB  OYXTTEB  xodimlari bilan hamkorlikda  korxonaning  sexlarida yong‘in xavfsizligi bo‘yicha profilaktik tadbirlar o‘tkazilmoqda.

Navbatdagi profilaktik tadbirlardan biri Karbamid ishlab chiqarish sexida tashil etildi, unda Karbamid va Polietilen qoplar ishlab chiqarish sexlarini  ishchi-xodimlari ishtirok etishdi.

Tadbirda  ishchi-xodimlarga  yong‘inlar va turli  xildagi  favqulodda  vaziyatlarning  kelib  chiqishi, bunday vaziyatlarda qanday harakatlarni  amalga  oshirish  kerakligi  to‘g‘risida  to‘liq ma’lumotlar berib o‘tildi.

Shuningdek,  tadbir  davomida  ishchi-xodimlarning  bilim  va  ko‘nikmalarini  oshirish maqsadida  yong‘in  o‘chirish  mashg‘uloti  o‘tkazilib,  unda birlamchi yong‘in o‘chirish vositalaridan foydalanish tartiblari, sohada  qo‘llanilayotgan  texnikalar  va ularning  imkoniyatlari  to‘g‘risida ma’lumotlar berib o‘tildi.

Tadbir  so‘ngida  ishchi-xodimlar  sanoat  va  yong‘in  xavfsizligi  qoidalari yuzasidan turli savollar bilan soha vakillariga yuzlandi va atroflicha javob olinib, kerakli ma’lumotlarga ega bo‘lishdi.

“Farg‘onaazot” AJ matbuot xizmati