“Favqulodda vaziyatlardan muhofaza qilish va fuqaro muhofazasi oyligi” doirasida korxonada o‘quv amaliy taktik mashg‘uloti Jamiyatning Sanoat xavfsizligi, Fuqaro muhofazasi va favqulodda vaziyatlar boshqarmalari, Qutqaruv otryadi, Davolash-sog‘lomlashtirish diagnostika sexi hamda FVB OYXTTEB xodimlari bilan hamkorlikda tashkil etildi.

Mazkur tadbirni tashkil etishdan asosiy maqsad xavfli ishlab chiqarish obyektlarida sanoat xavfsizligini ta’minlash, yuzaga kelishi mumkin bo‘lgan favqulodda vaziyatlarda fuqarolarni muhofaza qilish, yong‘inlar profilaktikasi samaradorligini oshirishdan iboratdir.

Bugungi tashkil etilgan tadbir Avariyalarni bartaraf etish rejasi asosida korxonaning Havo ajratish sexi tasarrufidagi 202-binosida joylashgan Azot quvuri yorilishi natijasida atrof muhitga ko‘p miqdorda azot gazi ajralib chiqishi bilan bog‘liq avariya sodir bo‘lganligini o‘z ichiga oldi.

Avariyani bartaraf etish jarayonida jabrlangan ishchi-xodimlar tezkor xizmatlar tomonidan, xususan, Qutqaruv otryadi, Yongin qutqaruv qismi, Tibbiy xizmat va idoraviy harbiylashtirilgan qo‘riqlash bo‘limlari jalb qilgan holda, insonlar hayoti uchun zararli modda tarqalgan hududni qurshab olib, odamlarni zararlangan hududdan olib chiqish mashqlari bajarildi.

 “Favqulodda vaziyatlardan muhofaza qilish va fuqaro muhofazasi oyligi” doirasidagi bu kabi tadbirlar korxonamizning barcha tarkibiy bo‘linmalarida olib boriladi.

“Farg‘onaazot” AJ matbuot xizmati